LAB sindikatuak Lakuako Gobernuak Bilbon duen lurralde ordezkaritza okupatu du astelehen honetan, ‘Benetako Kontsolidazioa orain! Hezkuntzako langileak babestu!’ lemapean.

Hezkuntza Sailaren menpeko irakasle, heziketa bereziko hezitzaile eta sukalde eta garbiketako langileen kolektiboetan, sindikatuak «estabilizazio prozesuetako lan eskaintza publikoetan lanpostu gehiago» eskaintzeko eskatu du, hain zuzen ere irakasleen kasuan, egiturazkoak diren lanpostuak, «egun aurrekontu zuzkidura dutenak», eta ezkutuan daudenak; bereziki, laguntza zerbitzuetan zerbitzu eginkizunen bidez betetzen direnak (lanbide heziketakoak, Iraleak, barnetegiak edota Berritzegunekoak). Heziketa berezian, «obra eta zerbitzu kontratu guztiak, urtero errepikatu direnak». Eta sukaldari eta garbitzaileen kolektiboan, «iruzurrean dituen eta ikasturtero errepikatzen diren lan metaketa kontratuak».

Gainera, «egiturazkoa bilakatu den prekarietateari amaiera ematea» aldarrikatu dute. «Kolektibo laboraletan, behin-behinekotasuna eta prekaritatea egiturazkoak izan dira azken urte luzeetan. Heziketa bereziko langile kolektiboetan 14 urte pasa dira LEP deialdirik gabe eta sukalde eta garbiketako zerbitzuetan 21 urte. Horregatik, urtez urte errepikatu diren laguntza kontratuak eskaintzaren parte izan behar dira eta kontsolidatu beharrekoak. Egiturazko lanpostuak dira», azaldu du LABek.

Madrilek ezarritako dekretu eta aginduetatik harago, «Euskal Herriko langileontzako neurriak bertan» erabakitzea exijitu dute. Izan ere, irakasleen kasuan, azaldu dute «birjartze tasan oinarrituriko oposizio lehiaketa arruntetan eskaini nahi dituzten plazetako asko estabilizazio prozesuen bitartez bete litezkeela, oposizio lehiaketa 'ez baztertzaile' edota meritu lehiaketaren bidez».

Azkenean, Hezkuntza Sailak estabilizazio prozesuen eskaintzaren negoziazioarekin jarraitzea kolektibo laboraletan eskatu du sindikatuak, heziketa berezian eta sukalde eta garbiketan, eta negoziazioari heltzea irakasleen eskaintzari dagokionean.

LABen ustez Hezkuntza Sailak orain arte emandako eskaintzen kopuruak ez dira nahikoak, eta horregatik eskatzen du maiatzaren 31ra arte dagoen epea negoziatzeko baliatzea.