NAIZ

Munduko eskolen heren batek ez du ez urik ez saneamendurik

Munduko eskolen heren batek ez du ez urik ez saneamendu-instalaziorik, ikasleen ongizatean eta eskolatzean eragin zuzena izanik, Unesco eta Unicefen arabera. Egoera honetan dauden 584 milioi ikasleetatik, %40a Saharaz hegoaldeko Afrikan bizi da.

Munduko eskolen heren batek ez dauka urik ez oinarrizko saneamendurik.
Munduko eskolen heren batek ez dauka urik ez oinarrizko saneamendurik. (Getty Images)

Munduko hiru eskolatik batek ez du ez edateko urik ez eta oinarrizko saneamendu-instalaziorik ere, eskolatzea asko oztopatuz, Unescok, Unicefek eta Elikagaien Munduko Programak asteazken honetan argitaratutako txosten baten arabera.

«Ikasleek hobeto ikasten dute eskola seguru eta osasuntsuetan. Hala ere, hezkuntza-erakunde gehiegik ez dute osasun eta ongizate ona bermatzeko beharrezko baliabiderik, edateko uraren eta saneamenduaren funtsezko instalazioak barne», deitoratu du Audrey Azoulay Hezkuntza, Zientzia eta Kulturarako NBEren Agentziako (Unesco) zuzendari nagusiak.

‘Ikastea eta aurrera egitea: Eskolako osasuna eta nutrizioa munduan’ izeneko txostenaren arabera, eskolako osasun eta nutrizioaren hornidurak «haurrak eskolara joan eta bertan gera daitezen sustatzen ditu».

Ezagutarazi dituen datuen arabera, eskola-janariak %9 igotzen du matrikulazioa eta %8 ikastetxera joatea; desparasitazioak eta nutrizio-gehigarriak emateak, berriz, 2,5 urte luza dezake anemia edo infekzio parasitario sarriak dituzten eskualdeetako haurren eskolatzearen iraupena.

Beste neurri batzuek, esate baterako, arreta oftalmologikoak, osasun mentala eta haurren ongizatea sustatzeak edo eskolako indarkeriaren prebentzioak, txostenean aztertuta ere bai, inbertsio ona dakarte, haurren eguneroko bizitza hobetzeaz gain.

«Eskolako elikadura-programek 9 dolarreko etekina eskaintzen dute inbertitutako dolar bakoitzeko, eta osasun mentalari heltzen dioten eskola-programek inbertitutako dolar bakoitzeko 21,5 dolarreko etekina eman dezakete», dio txostenak.

584 milioi ikasle

Eskolen %31k ez du ez edateko urik ez saneamendu-instalaziorik, eta horrek 584 milioi ikasleri eragiten die, horietatik %40 Saharaz hegoaldeko Afrikan.

Txostenaren arabera, «munduko ia herrialde guztiek eskola-otorduak ematen dituzten arren, kalkuluen arabera, haur ahulenen 73 milioik ez dute eskola-elikadurako programa horiek tokian bertan baliatzen».

Txostenaren egileek ikasleen «osasun fisikoa eta mentala, elikadura, ongizatea eta garapena babesteko eta sustatzeko ekintzak» eskatu dituzte.

Onuragarri izango diren neurrien artean, honako hauek aipatzen dira: eskoletan janaria ematea, txertoa jartzea, parasitoak kentzea, laguntza psikosoziala, osasun-hezkuntza eta osasuna eta ongizatea sustatuko dituzten ikaskuntza-ingurune seguru eta integratzaileak sortzea.