NAIZ

Hamaika atxilotu Irlanda iparraldean, otsailean polizia bat hiltzen saiatzeagatik

Pasa den otsailean polizia agente ofizial bat hiltzen saiatzeagatik hamaika pertsona atxilotu dituzte Irlanda iparraldean. Gertakaria eman zenean, IRA Berriak beregain hartu zuen heriotza saiakera eta esan zuen helburua «koroaren indarretako goi mailako kide bat hiltzea» zela.

Otsailean gertakaria eman zenean, polizia ingurua ikertzen.
Otsailean gertakaria eman zenean, polizia ingurua ikertzen. (Paul FAITH | AFP)

PSNI Irlanda iparraldeko Poliziak ostiral honetan jakinarazi duenez, hamaika pertsona atxilotu ditu iragan otsailean Omaghen ofizial bat hiltzen saiatzeagatik.

Susmagarriak, 21 eta 72 urte bitarteko bederatzi gizon eta bi emakume dira, PSNIk eskualde horretan egindako miaketen ondoren atxilotu zituzten, dagoeneko aktibo ez dagoen IRAren disidenteen jarduerei buruzko ikerketa zabal baten barruan.

John Caldwell inspektore burua bi lagunek tirokatu zuten otsailaren 22an, Omagheko kirol-gunean futbolari gazte talde bat entrenatzen ari zela, eskualdeko alderdi politiko guztiek gaitzetsi zuten ekintza orduan.

48 urteko polizia egoera kritikoan egon zen ospitalean ia hiru hilabetez, eta asteazken honetan egin zuen lehen agerraldi publikoa Belfasten, Charles III erregearen eta haren emazte Camilaren bisitaren harira antolatutako ekitaldi batean.

Atentatua bere gain hartu zuen  IRA Berriak

IRA Berriak, Irlandako Armada Errepublikanoaren (IRA) talde disidenteak, atentatua bere gain hartu zuen handik egun gutxira, eta «operazio militar» bat izan zela azaldu zuen, «koroaren indarretako goi mailako kide bat» helburu zuena. Talde armatuak oharrean ohartarazi zuenez, bere «inteligentzia zerbitzuak» orain «koroaren indarretako kideen mugimenduei buruzko segurtasun informazioa dute».

«Egunero familia-bizitza normala eramaten jarraitu beharko dutela abisatzen diegu; egun hauetako batean IRA zuen zain egongo da», gaineratu zuten erakundeko kideek.

26 urteko ibilbidearen ondoren, Caldwell PSNIko agente ezagunenetako bat da, askotan agertu baita komunikabideen aurrean IRAren zatiketei buruzko ikerketen berri emanez. Besteak beste, Caldwell agenteak gidatu ditu Ronan Kerr lankidearen eta Lyra McKee kazetariaren hilketen inguruko ikerketak.