Euskal Pentatloi Sariak larunbat honetan izango du final handia Azpeitian. Ikusmin handia espero da bertan hainbat faktoreengatik. Batetik, Andoni Iruretagoienak historia egin dezake bere laugarren txapela eskuratuz, Olasagasti eta Zaldua gaindituta, hiruna txapelekin berdinduta baitira. Lau pentatloi jarraian irabaziko lituzke gainera. «Aurten, sentsazioa dut, inoiz baino prestatuago iristen naizela hitzordura», dio aiarrak.

Bestetik, Xabier Zalduaren azken pentatloia izango da, hiru txapel lortuta emango dio amaiera zumarragarrak bere ibilbideari, baldin eta larunbatean ezustekoa eman eta laugarrena lortzen ez badu. Izeta VI.a hunkitu ere egin da hau aipatzean, bere erreferente izan baita urte luzeetan zehar.