Sing Sing izeneko espetxean girotzen den filma; mundu mailan segurtasun goreneko espetxe ezagunenetakoa da eta bereziki Estatu Batuetako kultura herrikoian espetxe baldintza latzak eta segurtasun neurri zorrotzak izateagatik ospetsua da. Narrazioaren erdigunean bertako preso talde bat kokatuko da: arte dramatikoen tailer batean parte hartzen dute eta beren antzezlan propioa egitea erabakiko dute. Antzerkiaren bidez, gizon horiek munduaz duten ikuspegia eraldatzea lortzen dute, eta borrokatzeko arrazoi bat aurkitu. Artearen –kasu honetan antzerkiaren– botere askatzailea eta sendatzailea agerian uzten duen filma da.

Adierazpen artistiko horren bidez, besteekin konektatzeko modu berri bat aurkituko dute. Lantegi barruan ematen duten pauso bakoitzarekin, arteak bizitzak eraldatzeko ahalmena duela deskubrituko dute, ezkutuko emozioak askatzekoa. Presondegiko errealitate latzaren aurrean ihesbide moduko batean bihurtuko da.

Colman Domingok antzeztutako Divine G da istorioaren ardatza; egin ez zuen krimen batengatik espetxean dagoen gizonezkoa da. Clarence Maclin, Sing Singeko preso ohia –Jon-Adrian Velazquez eta Sean ‘Dino’ Johnsonekin batera– eta antzerkiaren bidezko errehabilitazio programa baten sustatzailea, da filmaren beste protagonista; aktore gisa preso ohiak egoteak narratibari benetakotasuna emango dio.

Kartzelako dramen generoa birformulatzeagatik eta presoen inguruko estereotipoei desafio egiteagatik goraipatu dute filma; espetxearen helburu nagusia errehabilitazioa dela azpimarratuz, ez zigorra.