Kaleratzeak Stop plataformak kanona hutsik dauden etxebizitzetara zabaldu aurretik mobilizatutako pisuak alokairu sozialetara eta bereziki ‘Bizigune’ programara bideratzeko «pizgarri mekanismoak» ezartzea eskatu du. Hortaz, Lakuako Gobernuak etxebizitzak birgaitzeko laguntzak aurreratu ditzala proposatu du, ‘Bizigune’-n sartzearen truke.

Plataformak ohar batean azaldu duenez, ‘Bizigune’, etxebizitza hutsak alokairu babestuan jartzeko Lakuaren programa, «2021ean hasi zen, Etxebizitzaren 2021-23 Plan Zuzentzailearen datuen arabera, 7.200 etxebizitzarekin, eta ezarritako helburua zen 2023an 8.000 etxebizitza kudeatzea, programaren aurrekontua 42.359.093 eurora igoz».

«Bilakaera horri jarraituz, gaur egun 8.500 etxebizitza kudeatu beharko lirateke, baina errealitatea da kudeatutako etxebizitzak 7.475 direla (duela 4 urte baino 275 gehiago) eta aurrekontua 41 milioikoa da; beraz, ezin da argudiatu dirurik ez dagoela, erabili ez diren etxebizitza gehiagotarako aurrekontua aurreikusi baitzen eta programa helburuetatik oso urrun baitago», deitoratu du.

Ildo horretan, Denis Itxaso Etxebizitza sailburuak «hutsik dauden etxebizitzei kanona mekanismo mobilizatzaile gisa aplikatzearen» alde egindako apustuarekin bat datorrela esan du Kaleratzeak Stop elkarteak. Plataformak iaz eskatu zien hori udalerri handiei, mozio kanpaina baten bidez.

«Oraingoz Azpeitiak bakarrik erantzun badu ere», nabarmendu du «gune tensiodunak izendatzea eskatu duten udalerri gehienek hiru urterako» aurreikusita dutela plana aplikatzea.

Testuinguru «positibo» honetan, EAJk bakarrik gobernatzen dituen udalerrietan izan ezik, zeinetan kanona aplikatzearen aurka dauden, azpimarratu du kanona zabaldu aurretik, «mobilizatutako etxebizitzak alokairu libre eta sozialera bideratzeko beharrezkoak diren pizgarri mekanismoak ezarri behar direla, bereziki ‘Bizigune’ programara, udaletako eta erkidegoetako pizgarrien bidez».

«Aurrea hartu eta jabeei irtenbideak eskaini behar dizkiegu, ezin baitute argudiatu kanonak diru-bilketa izaera duela eta etxebizitzak interesatzen zaigun merkatura bideratu, hau da, alokairu libre eta sozialera», adierazi du plataformak.

Halaber, Etxebizitza Legea aldatzea defendatu du, «udalek kanonaren bidez bildutakoa erabiltzeko gaitasuna handitzeko, betiere etxebizitzarekin, laguntzekin, pizgarriekin, lurzoru publikoarekin eta abarrekin lotutako gaietan».

Benetako borondatea

Kaleratzeak Stop plataformak ohartarazi duenez, «datozen urteetan jenderik gabeko milaka etxebizitza alokairu sozialean sartzen ez baditugu, Eusko Jaurlaritzak edo horren zati batek horretarako benetako borondaterik ez duelako izango da».

«Itxasok behin baino gehiagotan adierazi du guk dioguna: justifikaziorik gabe jenderik gabeko etxebizitza bat mantentzea onartezina dela egungo egoeran, eta merkatua gorantz manipulatzen duela eskaintzarik ez dagoelako; beraz, ahal duten jabeek etxebizitza ez badute mugiarazten gogoak ematen ez dielako, kanona aplikatuko zaie aukera hori hautatu dutelako. Gainerakoa, oinarritzen ez den jabetza pribaturako eskubidearen erabilera antisozialari buruzko manipulazio bidegabea edo mantra faltsuak dira», nabarmendu du.