Abaltzisketako eta Amezketako 40 herritarrek LandaGO izeneko ibilgailu autonomoaren prototipoa probatu dute asteazkenean eta ostegun honetan. Gipuzkoako Foru Aldundiak bultzatuta eta Lakuako Gobernuarekin lankidetzan, landa eremuan mugikortasun autonomoa eta jasangarriaren eredu bat garatzeko proiektua da.

Aldundiak azaldu duenez, proiektua Europan aitzindaria da, eta bere lehen fasean dago, herritarren iritziak ezagutzeko eta egitasmoa landa ingurunean bizi direnen eskakizunetara egokitzen. Fase honetan oraindik gidari batek eta kopilotu batek gidatzen dute.

Tolosaldeko bi herri hauek lotzen dituen ibilbidean probatu da autoa; izan ere, Gipuzkoako landa eremuko ohiko ezaugarriak ditu, hala nola maldak edo bihurgune itxiak. Horri esker, teknologiaren bideragarritasuana ebaluatu ahal izango da testuinguru konplexu batean, eta datuak atera ahal izango dira etorkizuneko ezarpenetarako.

Xabier Arruti Lurralde Oreka Berdeko foru diputatuak azaldu duenez, proba hauen helburua herritarrak ibilgailuarekin ohitzea da, proiektua arrakastatsua izateko beharrak barneratzea eta etorkizuneko erabiltzaileen konfiantza beharrezkoak direlako.

Zortzi hilabete

Aldundiak gogorarazi du LandaGO proiektuaren lehen fasea 2024ko azaroan hasi zela, teknologiaren bideragarritasuna aztertzera eta hura ezartzeko datu kritikoak ateratzea bideratutako lehen probekin.

Zortzi hilabete hauetan 20 grabaketa egin dira, baldintza meteorologiko eta argiztapen desberdinetan. Gidatutako probak ere egin dira, ibilbidearen jarraipena egiteko teknologiak erabiliz, beste ibilgailuekiko segurtasun distantzia mantentzea ahalbidetzen duten errei-lineak eta abiadura egokitzeko sistemak detektatzeko.

2025eko abuztutik abendura bitartean Abaltzisketa eta Amezketa arteko tartean ikasitakoa Zerain eta Segura artean egingo den beste froga batean aplikatzea espero dute.