Euskal presoak behingoz etxeratzeko aldarrikapena begibistakoa da Gasteizko txosnetan Ama Zuriaren jaiak abiatu zirenetik. Elkartasun hori ezabatzeko deia egin du Buesa Fundazioak sare sozialen bitartez asteazken honetan. Gasteizko Udala, Arabako aldun nagusia eta PPko ordezkariak batu dira kanpaina honetara, baina helburua lortu gabe.

Esta es la realidad de lo que pasa estos días en el recinto de las txosnas de las fiestas de #VitoriaGasteiz 2025.

Y esta misma situación se repite cada año en muchas de las fiestas de los pueblos y ciudades de Euskadi y Navarra frente a la indiferencia de parte de la sociedad… pic.twitter.com/aFRiNlkiOn

— Fundación Fernando Buesa Blanco Fundazioa (@Fundacion_Buesa) August 6, 2025

Gasteizko Udaletik Buesa Fundazioari helarazi diotenez, udaltzainek egunero kentzen dituzte afixak garbiketa lanak egiten direnean, baina berriro agertzen dira gero. «Batzuek jaiak politizatzeko saiakeran tematzen dira, tamalez», aipatu dute Alkatetzaren iturriek berri ajentzien bidez.

Buesa Fundazioak seinalatu dituen karteletan legezkoak diren aldarrikapenak jasotzen dira, orain arte jazarpenik jasaten ez zutenak: presoak etxeratzearen aldekoak, amnistia eskatzen dutenak, baita Francoren biktima izan ziren ‘Txiki’ eta Otaegi gogorarazten dituzten mezuak ere. Gogoratuko denez, duela zenbait urte presoen argazkiak izkutatzeko kanpaina garatu zen txosnaguneetan: Gasteizen 2017an sartu zen Ertzaintza bertan, irudi horiek kentzeko.

Ramiro Gonzalez Arabako ahaldun nagusiak Buesa Fundazioaren salaketarekin bat egin du. Bere ustez, kartel horiekin «biktimei egiten zaie eraso». «Ez naiz horrekin ohitutzen eta ez dut normaltasunez hartzen», aipatu du Gonzalezek sare sozialen bitartez.

PP eta Voxekin bat egin du honekin Gonzalez. Gasteizko Udalean PPren eledun den Iñaki Garcia Calvoren aburuz, «samina zabaldu dutenei gorazarre egiten die aurten ere ezker abertzaleak, nazkagarria da». Voxen aldetik Amaia Martinez legebiltzarkideak erantsi duenez, «zaborra» dira afixa horiek, eta horren aurrean «euskal erakundeek beste alde batera begiratzen segituko ote duten» galdetu du.