Nafarroako Bertsozale Elkarteak Nafarroako Bertsolari Txapelketaren edizio berria aurkeztu du. Navarra Arenan eskainitako prentsaurrekoan, elkarteko koordinatzailea den Saioa Onekak azpimarratu du txapelketa proiektu kolektibo bat dela, elkarlanean eta borondatezko lanean oinarritzen dena, eta erakundeen babesa eta laguntza garrantzitsua dela, eta eskerrak eman dizkio Euskarabideari, Nafarroako Gobernuari eta Laboral Kutxari, babesle izateagatik, txapelketa hartuko duten udalei, haien ekarpenagatik, eta prestaketa lanetan ariko diren pertsonei.  

Jarraian, Javier Urtiagak, Euskarabideako zuzendari kudeatzailea, azaldu zuenez, «euskarazko kultur adierazpide bere-berekia den bertsolaritza babestu eta sustatu beharrarekin konpromisoa du Euskarabideak», eta bertsolariek «haien sormena partekatuko dute nafar jendartearekin eta, horren eskutik, haien hausnarketak, umorea, emozioak, kritika soziala eskainiko dizkigute», eta, jarraian, bertsolariei, antolatzaile eta boluntarioei eskerrak eman dizkie eta herritarrak saioetara joatera animatu ditu.

Eta, azkenik, Nerea Bruño Nafarroako Bertsozale Elkarteko lehendakariak azpimarratu du bertsolaritzak «euskarari eta euskarazko kulturari ekarpen mamitsua» egingo diola «Nafarroako hainbat eskualde eta bazterretara hedatuz». Adierazi duenez, «2023ko edizioan, Anaitasunako finala inoiko jendetsuena izan zen. Gorakada ari da bizitzen bertsolaritza Nafarroan». «Horregatik, 2025eko txapelketako finala Nafarroa Arenan izango da lehenengoz».

BTN25: partehartzaileak eta egutegia

Bi urte igaro dira azken txapelketatik. 30 bertsolarik eman zuten izena aurtengoan, eta sailkatze fasea pasata, 24 bertsolarik parte hartuko dute. Txapelketako beteranoekin aurpegi berriak izango dira NBT25ean, eta hiru txapeldun ere lehiatuko dira: Julen Zelaieta, Saioa Alkaiza eta Julio Soto, egungo txapelduna.

Lehenengo faseak lau saio izango ditu. Lehena, Auritzen, urriaren 4an, bigarrena, Mutiloan, urriaren  11n, hirugarrena Iruritan, urriaren 18an, eta laugarrena Los Arcosen, urriaren 26an. Lehen fase honetan parte hartuko duten 24 bertsolarietatik 18 finalaurrekoetara pasako dira.

Finalaurrekoetako saioak Agoitzen, Leitzan eta Tafallan izango dira, azaroaren 1ean, 8an eta 16an, hurrenez hurren. Eta azkenik, finala azaroaren 29an jokatuko da, Iruñeko Navarra Arenan, 17.00tan.

Zortzi bertsolarik parte hartuko dute, eta puntuazio altuena lortzen duten biek buruz burukoa jokatuko dute. Bien arteko onenak irabaziko du 2025eko Nafarroako Bertsolari Txapelketaren txapela.

Zortzi saio izango dira denera, beste horrenbeste udalerritan. Nafarroako Bertsozale Elkarteak bere egitasmoa eta bertsolaritza Nafarroako lurralde osora hedatzeko apustuan urrats berri bat emango du aurtengo txapelketarekin.

Saio guztietarako sarrerak www.bertsosarrerak.eus atarian erosi ahal izango dira gaurko 12.00etatik aurrera. Saioen egunean bertan ere leihatilan salgai jarriko dira, internet bidezko salmentan agortu ez badira.