Azken 15 urteetan emakumezkoen tropelak izan duen euskal txirrindularirik onenak amaiera jarriko dio bere ibilbide profesionalari. Honela iragarri du Ane Santestebanek ostiral honetan, prentsaren aurrean egindako agerraldian. «Ez dut lasterketa askorik irabazi, baina zerbait baliogarriagoa bai: errespetua, babesa eta txirrindulari izatearen harrotasuna».

Igande honetan, Eibako Sari Nagusian, jantziko du azken aldiz dortsala. Etxean eta txirrindulari gisa hazten ikusi dutenengatik inguratuta.

Hamarkada eta erdi honetan ibilbide ona izan du Errenteriako txirrindulariak nazioarteko probarik gogorrenetan. Lehen hamarretan sailkatu da Giroan (hiru bider) eta Tourrean. Euskal txirrindularitzaren erreferente nagusi izan da, hutsune nabarmena zegoen garai batean. Orainak eta etorkizunak emankorragoak dirudite zentzu horretan.

Errenteriarrak bigarren postu dezente ere baditu, baina errematatzea falta izan zaio askotan. Era berean, emakumezkoen txirrindularitzan mendate gogorrak oso urriak ziren orain ez asko arte, eta hor moldatzen da hobekien Santesteban.

«10 edo 11 urterekin hasi nintzen bizikletan, jakin gabe lehen bultzada hark hain urrun eramango ninduela. Gaur, 34rekin, sentitzen dut bizikleta profesionaletik jaisteko unea iritsi dela. Datorren igandean, Eibarren, nire azken lasterketa lehiatuko dut. Kirola baino askoz gehiago izan den etapa baten amaiera izango da: nire bizitza izan da. Txirrindularitza izan da nire pasioa, nire eskola, nire etxea. Eta hamaika sari irabazi ez ditudan arren, bihotza ezertan aldatuko ez nituzkeen uneez bete dut», adierazi du.

Debabarrenan eta Bizkaia-Durangon ekin zion bere ibilbideari, eta bertan lortu zuen ibilbide profesionaleko garaipen bakarra, 2013ko espainiar txapelketa. Hortik salto egin zuen nazioartera, Ale-Cipollini, WNT eta Jayco bezalako taldeetara. 2024an itzuli zen etxera, Laboral Kutxara, taldeari emaitzak eta esperientzia eskaintzeko helburuarekin.

Santestebanek azaldu zuenez, 2024an min handiak izan zituen, ondoez iraunkorra, errendimendu baxua, mina pelbisean, bizkarrean eta ezkerreko hankan. Azterketa asko egin ondoren, ginekologia-azterketa batean, 2024ko urriaren 31n, endometriosia eta kiste bat atzeman zioten obulutegi batean. Lasterketara joatea «amesgaiztoa» izaten ari zela adierazi zuen iazko urte amaieran.

Lehiatzera itzuli zen arren, ez du lortu aurreko maila berreskuratzea. Eta lortu duenean ere, zorteak ez du lagundu. Espainiar txapelketa poltsikoan zuen, buruan bakarrik zihoala lurrera joan zenean. Igandean, Eibarren, azken aukera izanen du.