Gipuzkoako Foru Gobernuak ostiral honetan hasi du 2026rako aurrekontu proiektuaren babesak negoziatzeko lehen erronda, eta oposizioko taldeek, EH Bildu, PP eta Elkarrekin Podemosek, datorren urterako aurrekontuak «hobetzeko, negoziatzeko eta ekarpenak egiteko prest» daudela adierazi dute.

Oposizioko taldekideekin elkartzeko ardura Eider Mendoza ahaldun nagusiak, Jose Ignacio Asensio Jasangarritasuneko diputatuak eta Itziar Agirre Ogasun eta Finantza diputatuak izan dute. 

EH Bildu eta Elkarrekin Podemos, hobetzeko lanean

Maddalen Iriarte EH Bilduko bozeramaileak azaldu duenez, «harremanetarako lehen bilera izan da, eta, nola ez, atsegina izan da, beti bezala». Iriartek esan du oraindik ez dutela aurrekontua «sakon» ezagutzen, joan den ostegunean eman zietelako, eta, adierazi duenez, «xehetasun askotan jarri behar da lupa».

Nolanahi ere, EH Bilduk, «aurrekontua hobetu dezakegun heinean», datozen egunetan Aldundiarekin lanean jarraituko duela adierazi du, «urtero egiten dugun bezala».

Miren Echeveste Elkarrekin Podemoseko bozeramaileak aurrekontuen lehen bileraren balorazio «positiboa» egin du, «oso zehatza» izan baita. Zehaztu du: «Proposamen horiek egoitzetako eta eguneko zentroetako koordainketa berrikusteari, egoitzetako langileen hitzarmena eguneratzeari, Andoaingo N-I eta A-15 errepideen bidegurutzea konpontzeari eta baso-agenteen kopurua handitzeari buruzkoak dira».

Hala, azaldu du Foru Gobernuari «denbora» eskatu diotela «aurrekontua sakon aztertzeko», eta azterketa horiek egin ostean berriro elkartuko direla adierazi du. «Beraz, balorazio positiboa, eraikitzailea eta aurrekontuei begira topagune bat aurkitzen dugun ikusteko hitz egiten ari gara», amaitu du.


PPk, zaintza eta N-I errepidea lehentasun

PPko Mikel Lezama Batzar Nagusietako bozeramaileak bileraren ostean adierazi duenez, bere alderdiak «bat egiten du» Foru Gobernuak aurrekontuetan planteatzen dituen lehentasunetako batzuekin, besteak beste, zaintzara eta gizarte zerbitzuetara bideratutako partidak igotzearekin.

Bere ustez, PPk legegintzaldiaren hasieratik eskatu izan duen «etorkizunera begirako asmoen adierazpena» da inbertsioak norabide horretan egitea; izan ere, «Europako populazio zaharrenetakoa izanik, prestatzen hasi beharra dago».

Ildo horretan, Lezamak adierazi du planteamendu horiek partekatzeaz gain, bere alderdiak bestela partidak ere jarriko dituela mahai gainean. Hala, «N-I errepidean indar handia» egingo dutela aurreratu du, «egunero gertatzen diren auto-ilaren arazoa konpontzen saiatzeko». Ekonomia eta enpresa arloei dagokienez, PPk merkataritza txikia indartu nahi du, «merkataritza asko ixten ari delako».