Gipuzkoan, 90 haur eta nerabe inguru daude harrera familia baten zain. Datu hori larunbat honetan eman dute herrialdeko Harrera Familien XXIII. Topaketan, non lurraldean haurren babesarekin konprometitutako familiak eta profesionalak bildu diren.

Gaur egun, Gipuzkoako Foru Aldundiak 815 adingaberen tutoretza du, eta horietatik 489 zentroetan bizi dira eta 326 harrera familiekin.

Jardunaldia Zainketetako eta Gizarte Politiketako diputatu Maite Peñak inauguratu du, eta, nabarmendu duenez, «Gipuzkoa komunitate solidario eta arduratsua da, herritar guztien ongizate integrala zaintzen duena, herritar zaurgarrienak babesteko konpromisoa hartzen duena eta horretarako antolatzen dena». Horren froga dira, gaineratu duenez, harrera familiak beraiek, «lurraldeko balioen adibiderik onenetako bat».

«Denok dakigu zer konpromiso eskatzen duen etxeko ateak norbaiti irekitzeak. Horregatik, eskerrak eman nahi dizkiet harrera familiei eta arlo honetan lan egiten duten elkarteei, egunero egiten duten lan apartagatik», azpimarratu du Peñak.

Diputatuak, amaitzeko, gogorarazi du familia harreraren helburua dela haurrei eta gazteei egonkortasuna eta ongizatea ematea, afektua ematen dieten eta beren beharrak betetzen dituzten familietan: «Harrera familia izateak esan nahi du, modu altruistan, adingabea etxeko beste kide bat bezala integratzea, haren garapen emozionala, fisikoa eta soziala bermatuz, administrazioarekin lankidetzan. Ez da adopzio bat, ezta adopzioaren aurreko urrats bat ere, adingabe bakoitzaren historia errespetatzen duen babes neurri bat baizik».

Eskuzabaltasuna eta erantzukizuna

Jardunaldian zehar, harrera «eskuzabaltasun eta erantzukizun sozial handiko ariketa» gisa nabarmendu da. Haurren babesaren arloko 150 familia eta profesional baino gehiagok parte hartu dute topaketan.

Edizio honetan, ekitaldiak harreraren begirada erlazionala jorratu du, «Nork zaintzen du nor?» galderaren eskutik, jardunaldiaren hausnarketa gidatu duena. Era berean, jardunaldiak balioa eman dio Beroa, Lauka (Familia Harrerarako Laguntza Teknikoko Zerbitzua) eta Agintzari (Familia Harrera Espezializatuko Programa) elkarteek egiten duten lanari.

Gaur egun, Gipuzkoako Foru Aldundiak hiru harrera modalitate eskaintzen ditu: larrialdikoa, gehienez ere sei hilabetekoa eta berehalako ebaluazioa behar duten egoeretarako; aldi baterakoa, gehienez bi urtekoa, jatorrizko familiek haurraren zaintza berreskuratzeko aukera duten adingabeentzat; eta modalitate iraunkorra, epe laburrean haurrak familiarengana itzultzea aurreikusten ez denean. Adin nagusitasunera iristean, bizikidetzak jarrai dezake, bi aldeek hala nahi badute, helduarorako trantsizioan lagunduta.

Familia harrerako programari buruz gehiago jakin nahi dutenek Gipuzkoako Foru Aldundiarekin jar daitezke harremanetan 682 554 433 telefono zenbakira deituta edo webgune ofiziala kontsultatuta.