LABek greba deitu du Araba, Bizkai eta Gipuzkoako eskola publikoetako jangeletan heldu den otsailaren 24, 25 eta 26an, enpresei negoziazioari berrekiteko eskatzeko eta langileekin dituzten zorrak ordaindu ditzatela, batetik, eta Lakuako Gobernuko Hezkuntza Sailari «modu erreal eta eraginkorrean negoziatu dezan» exijitzeko, bestetik. «Jasanezina bihurtu den eta, erantzunik eta konponbiderik gabe, denboran luzatzen ari den egoera baten aurrean» erabaki du sektorean gehiengoa duen sindikatuak mobilizazioetara jotzea.

«Hitzarmen kolektiboaren blokeoaz ari gara, jada itundutako soldata igoerak ez aplikatzeaz eta funtsezko gaietan (ratioak, funtzioak eta lanaldiak, esaterako) erabateko aurrerapenik ez egoteaz, alderdi horiek zuzenean eragiten baitiote langileen egunerokotasunari eta eskola jangelen funtzionamenduari», adierazi du ohar batean.

LABen arabera, egoera hori ez da berria, «baina negoziatzeko borondaterik ezak larriagotu egin du, bai enpresen aldetik, bai arlo horretan eskumen zuzenak dituzten Eusko Jaurlaritzako Hezkuntza Sailaren aldetik».

Alde batetik, sindikatuak patronalari eskatzen dio «berehala negoziatzera esertzeko eta langileei ordaintzeko adostuta dauden soldata igoerak, hitzarmenean bertan jasotako eskubidea baita, eta sistematikoki urratzen ari dena».

Bestalde, Lakuako Hezkuntza Sailari galdegiten dio «behingoz dagokion erantzukizuna bere gain hartzeko eta negoziatzera esertzeko, ratioak, funtzioak eta lanaldiak arautzen dituen araudia aldatzeko». Izan ere, araudi horrek «ez die erantzuten ez ikastetxeen egungo errealitateari, ez zerbitzu publiko horri eusten dioten langileen benetako beharrei», LABen ustez.

«Nekatuta promesekin»

Nabarmendu duenez, langileak «nekatuta daude bete gabeko promesekin, etengabeko atzerapenekin eta beren lan baldintzak nola okertzen diren ikustearekin, haien eguneroko ahaleginari eta konpromisoari esker zerbitzuak funtzionatzen jarraitzen duen bitartean». Horrenbestez, grebara jotzea erabaki du sindikatuak.

Azpimarratu du, gainera, gatazka honek ez diela eskola jangeletako langileei bakarrik eragiten, baizik eta «eragin zuzena duela ikasleei ematen zaien zerbitzuaren kalitatean». Horregatik, dei egin dio hezkuntza komunitate osoari aldarrikapen horrekin bat egin dezan eta «Eusko Jaurlaritzari araudi aldaketa eska diezaion».

«Eskola jangeletako langileentzako lan baldintza duinak defendatzea ikasleentzako kalitatezko zerbitzu publiko segurua eta egokia defendatzea ere bada», insistitu du.

ELAk ere bai

ELAk ere greba deitu du bere aldetik otsailaren 24, 25 eta 26rako, ohar batean iragarri duenez.

Negoziazio mahaiak «15 bilera baino gehiago egin ostean dator deialdia. ELAk dioenez, «argi du zein diren hitzarmena sinatzeko gutxieneko edukiak», baina, «batez ere, ez du sinatuko soldata mugak ezartzen dituzten hirugarrenen mendeko hitzarmenik».

Langileen «benetako baldintzei erantzungo dien hitzarmen baten alde» egin du, eta aldarrikapen nagusiak zerrendatu ditu: KPItik gorako soldata igoerak, soldata mugarik gabe eta beste hitzarmen batzuetara itzuli gabe; egungo ratioak eta lan kargak berrikustea; eta lanaldi partzialak «oso prekarioak» diren sektore bateko gutxieneko kontratazioak berrikustea.

Horrekin batera, nabarmendu du ez diola «uko egingo aurreko hitzarmenean sinatutako soldata igoerari. Gure ustez, enpresek ez dituzte aplikatzen 2024. eta 2025. urteetako igoerak, plantillei presioa egiteko».