Gipuzkoako Foru Aldundiko Kultura eta Kirol Departamentuak gure lurraldeko eta Espainiako surfaren historian funtsezko figura den Marian Azpirozi emango dio 2026ko Carmen Adarraga saria martxoaren 11n, 18.00etan, egingo den ekitaldian.

2026ko Carmen Adarraga Sariaren epaimahaiak Azpirozek aitzindari eta erreferente gisa egindako «ibilbide bikaina» nabarmendu du. «70eko hamarkadan zeregin erabakigarria izan zuen orduan ezagutzen hasi berria zen kirola profesionalizatzeko, enpresa ikuspegia eman zion, eta Gipuzkoa surfaren nazioarteko mapan kokatzeko ekarpen handia egin zuen», azpimarratu dute antolatzaileek.

Marian Azpiroz (Aginaga, 1949) Pukas Surfeko sortzailea da, Iñigo Letamendia senarrarekin eta Miguel Azpiroz anaiarekin batera. Saritua izango den emakumea gaur egun ezaguna da 1979tik nazioarteko proiekzioa duen familia enpresa arrakastaz kudeatuz surfaren industria Euskal Herrian eraldatzeagatik.

Marian Azpirozek emakumeen eta gizonen arteko lankidetzaren aldeko apustua egin zuen, berrikuntzaren eragile gisa, 70eko hamarkadatik, surfa ia existitzen ez zen garaitik. Bikiniak ehuntzen hasi zen, Iñigo Letamendia senarrak surf taulak eskuz egiten zituen bitartean. Dendak irekitzen jarraitu zuten (lehena Zarautzen, 1977an), josteko tailerrak, taula fabrikak, surf eskolak eta marka mundura eraman zuten nazioarteko ekitaldien antolaketarekin.

Bestalde, funtsezko figura da Espainiako surfaren historian. Oinarritik ekin zion surfaren garapenari, eta 70eko hamarkadan taulen artisau-fabrikazioaren lehen urratsetan parte hartu zuen. Denborarekin, tailer izatetik nazioarteko erreferente izatera igaro zen Pukas, eta bertan egindako taulak munduko txapeldunek erabili izan dituzte.

Epaimahaiak, halaber, Gipuzkoako surfaren kanpo proiekzioan izan duen begirada estrategikoa nabarmendu nahi izan du, bereziki nazioarteko ekitaldiak bultzatuz, hala nola, Pukas Pro lehiaketa. Haren bidez, Zarautz munduko surf zirkuituaren mapan kokatu zen eta prentsa espezializatuaren aintzatespena jaso zuen.

Era berean, une kritikoetan izan duen lidergoa hartu du kontuan, hala nola, 2017an fabrikak su hartu ondoren berriz eraiki behar izan zutenean, eta baita tokiko talentuaren alde egin duen apustua ere, surflariaren ibilbideak babestuz, Aritz Aranbururena esaterako.

Goizane Alvarez diputatuak adierazi duenez, «Marian Azpirozi aintzatespena egitea industria, kultura eta komunitatea ere baden kirola egiteko modu bati aintzatespena egitea ere bada. Hamarkadetan zehar, emakume askok proiektu, klub, kirol-familia eta egitura osoei eutsi diete, fokurik eta txalorik gabe. Sari hau modu bat da ikusezintasun hori konpontzeko eta argi eta garbi adierazteko berdintasuna ez dela aldarrikatzen; eraiki egiten da erreferenteen bidez, baliabideak jarrita eta bidea irekitzen duten erabaki publikoak hartuta. Izan ere, kirol bidezkoagoa, anitzagoa eta feministagoa eraikitzeko, ia inork kasurik egiten ez zionean kirol hori ahalbidetu zutenak ere aintzat hartu behar dira».

Aintzatespen horrekin, Marian Azpiroz Carmen Adarraga Saria jaso duten emakumeen zerrendan sartzen da. Horien artean daude Marta Funes, Coro Fuentes, Mari Ayestaran, erraketistak, Nieves Alza, Arantza del Puerto, Carmen Diez Mintegui, Azu Muguruza, Garbiñe Etxeberria eta Tati Garmendia.