Pirinioetako Emakumeen XIX. Topaketa egingo dute Ariben

Egitarau oparoarekin dator Pirinioetako Emakumeen topaketa, larunbatean izango da Aribeko Aezkoako etxean, eta «norberak bere burua ezagutzeko eta garapen pertsonala bultzatzeko» balio duen eneagrama izeneko tresna izango da topaketen ikurra.

naiz+|2019/10/22
Eneagrama
Eneagrama izango da aurtengo topaketen ikurra.

Hemeretzigarrenez egingo dute larunbat honetan (urriaren 26an) Pirinioetako Emakumeen Topaketa, oraingoan Aribeko Aezkoako etxean; «Emakumeak, sarean harremanak sendotzen eneagramarekin» lelopean.

Pirinioetan bizi diren emakumeen «indarguneak ezagutu» eta horiek ahalik eta gehien garatzeko helburua dute antolatzaileek eta, horretarako, eneagrama erabiliko dute, norbere burua ezaugarritu eta garatzeko baliagarria den zirkulu itxurako «tresna» bat. Horrela, bertako emakumeen «sare sendo eta iraunkorra» osatzen saiatuko dira larunbatean.

Egitaraua

Egun osoko egitaraua osatu dute larunbaterako. Hala, gosaldu ostean, eneagramari buruzko hitzaldi batekin hasiko dute eguna jardunaldietan parte hartuko duten emakumeek, Miren Cía entrenatzaile, hezitzaile, formakuntzan aditu eta aholkulariak gidatuta.

Eguerdian, hamaiketakorako tartetxo bat hartu eta gero, aipatu sare sendo eta iraunkorra osatzeko tailer praktikoari ekingo diote –betiere eneagraman oinarrituta– eta, egunari amaiera emateko, bazkal ondotik, “Gerbera Luchadora” antzerkia taularatuko da.

Pirinioetako Emakumeen XIX. Topaketak «eragiten diguten arazoen inguruan hausnartzeko gogoa duten pertsona guztiei» zuzenduta daudela jakinarazi dute antolatzaileek.