LAB, CGT, CFDT, FSU eta Solidaires-ek osaturiko intersindikalak antolatu du erantzun zabala ukan duen martxa anitza. (Patxi BELTZAIZ)
Palestinarekiko elkartasun adierazpenak izan dira Maiatzaren Lehen honetan ere, Israelek Gaza sarraskitzeari ekin eta urte eta erdira. (Patxi BELTZAIZ)
Bi mila lagun pasa batu dira Baionako geltokitik abiatu den manifestaziora. (Patxi BELTZAIZ)
Donald Trumpen politika inperialista salatu du Bizi! mugimenduak. (Patxi BELTZAIZ)
Tokiko mugimendu anitzek hartu dute parte Langileen Nazioarteko Egun honetan, hala nola Bizi!, Sutan, Alda eta Etorkinekin-Diakitek. (Patxi BELTZAIZ)
Haymarket Squareko sarraskia gogoratu dute anarkistek, Estatu Batuetako zortzi orduko eguneko borrokaren gailurtzat hartua dena, 1886an Chicagon gertaturikoa. (Patxi BELTZAIZ)
Transfeminsmoa klase borroka dela azaleratu du Sutanek, emazte, trans eta bolleren eskubideak defendatzen dituen kolektiboak. (Patxi BELTZAIZ)
Iaz egin ziren hauteskunde legegileen karietara Euskal Herrian eratu zen Fronte Herritar Berriaren aldeko sostengu komiteak ere bere aldarriak plazaratu ditu. (Patxi BELTZAIZ)
Herritarren Ekimenerako Erreferendumaren (HEE) eskaera izan da ere, 2018tik jaka horien mugimenduaren aldarrikapen nagusi bilakatu den herri-ekimeneko dispositibo proposamena. (Patxi BELTZAIZ)
2024an lehen aldiz LAB intersindikalaren baitan zela antolatu zuten Maiatzaren Lehena, eta dinamika bateratuari jarraipena eman diote aurtengoan. (Patxi BELTZAIZ)
Oholtzatik, gerra ekonomikoaren ereduari zein faxismoaren gorakadari aurre egiteko deia hedatu dute sindikatuek. (Patxi BELTZAIZ)
Jendartearen gutiengoak aberastasuna pilatzen duen bitartean, kapitalismoak langileen bizitza okertzen jarraitzen duela salatu dute martxaren antolatzaileek. (Patxi BELTZAIZ)
Abesbatza feministarekin borobildu dira aldarriak hiriko merkatu plazan. (Patxi BELTZAIZ)
Ondotik, taloak jateko parada eskaini dute sindikatuen herrixkan. (Patxi BELTZAIZ)
Arratsaldean, gerra inperialistari ez errateko, Europako estatuen berrarmatzearen kontra hartu dituzte berriz herritarrek Baionako karrikak, Kontseilu Sozialistaren deiari erantzunez. (Patxi BELTZAIZ)
Maiatzaren Lehena: bi mila lagunetik gora batu dira aniztasunez beteriko martxara Baionan
Banderolen eta eguzki betaurrekoen arteko lehia estua jokatu da maiatzaren lehenaren karietara. Bisitari anitz trenez heltzen direnez Baionara geltokiaren kanpoaldean maleta gurpildunek manifestariekin egin dute topo. Kontraste irudi bat aniztasunez beteriko martxaren atarikoan.
2025 MAI. 02
