Andoain, Urnieta, Hernani eta Astigarraga herriek osatzen duten triangeluan Francisco Franco hil ondoren eskuin-muturreko taldeek mehatxu, jipoi eta hilketen bidez izugarrizko jarduera izan zuten. Zortzi hilketa izan ziren, horietatik lau Hernanin, eta zazpi hilabeteko epe laburrean.

Hau guztia biltzeko “Heriotzaren triangelua” dokumentala egin dute Imanol Laburuk eta Jose Mari Salinasek, Hernaniko Udalaren laguntzarekin. Gertatutakoaren egia eta memoria zabaltzea eta etorkizuneko elkarbizitzaren oinarriak jartzea da helburua. Dokumentala ostiralean estreinatuko dute, 22.30ean, Hernaniko Gudarien Plazan.