Kaiku Km0ko langileek (lehen Sociedad Distribuidora Alimentaria) greba hasi zuten astelehenean, bertako enplegu politikari aurre egiteko. Kaiku Km0k izen bereko produktuak banatzen ditu, eta 30 langile ditu, gehi beste 15 bat aldi baterako lan enpresen bidez ari direnak. Grebaren helburua da «prekaritatearen eta aldi baterako lanerako enpresen (ABLE) abusuzko erabileraren aurka» borrokatzea. ELAk salatu duenez, 4 milioi eurotik gorako etekinak lortu dituen Kaiku taldeko enpresak greba oztopatu nahi du legez kanpokoa dela argudiatuz eta ABLEen bidez grebalariak ordezkatuz edo administrazio eta kudeaketako langileak baliatuz.