Cristobal Balenciagaren gaineko bi erakusketa aurkeztuko dituzte gaur Parisen, Estatu espainoleko enbaxadan. Batetik, “Balenciaga, l’oevre au noir”, gaurtik aurrera Pariseko Bourdelle museoan ikusi ahalko dena eta, bestetik, “Rachel L. Mellon Collection”, maiatzean Getariako Cristobal Balenciaga museoan ikusgai egongo dena. Balenciagak Donostian lehenengo denda jarri zuenetik ehun urte betetzen dira aurten eta data hori ospatzeko aitzakian museoak antolatu dituen ekimenen barnean kokatzen dira bi erakusketok. Getarian jarriko dutenari buruz aurreratu dute Mellon Balenciagaren bezero garrantzitsuenetakoa izan zela eta erakusketa estatubatuarraren ondarearen gaineko monografikoa izango dela.