Tolosako Asuncion klinika kudeatzen duen Inviza enpresako langileek lanuzteak eta grebak egingo dituzte datozen egunetan, LABek eta ELAk deituta, hitzarmenaren negoziazioaren blokeoa salatzeko.

Ohar batean azaldu zutenez, ospitaleko zuzendaritzari eskatu diote jarrera aldatu dezala, eta langileen erosahalmena bermatu eta lanorduak murriztuko dituen hitzarmena negoziatu dezala.

Sindikatuon arabera, Invizako hitzarmenak «ez aurrera ez atzera» segitzen du. Negoziazio mahaia 2022ko martxoan eratu arren, «denbora aurrera doa eta zuzendaritzak ez ditu murrizketak besterik proposatzen». Horregatik, langileek lanuzteak eta grebak egitea erabaki dute.

Klinika pribatua da, baina hitzarmena du Osakidetzarekin. Langileek diotenez, zerbitzu publikoa eskaintzen dute. «Urteak daramatzate» lan baldintza duinen alde borrokan, eta hitzarmenaren kasuan, «administrazioko azpikontrata askotan astean 35 ordu lan egiten dutenez», erreferentzia hori hartu dute. KPIa oinarri duten soldata igoerak eskatzen dituzte.