Berrogeita zazpi urte luze joan dira Erandioko Celaya ontziolak Guayas itsasontzia eraiki zuenetik eta, 1977. urte hartatik lehen aldiz, egun Ekuadorreko Armadaren eskola-ontzia den honek atzo zapaldu zuen sortzen ikusi zuen herrialdea. Bilboko Itsasmuseumeko kaian lehorreratu da Guayas eta Ekuadorreko 24 probintzietako baten izena hartu zuen belaontzi hau asteburuan zehar dohainik bisitatu ahalko da bertan, 11.00etatik 20.00etara. Igandean, gainera, tripulazioko kideez osaturiko orkestrak kontzertu berezia eskainiko du.