Mendiaren Etxea irabazi-asmorik gabeko elkarteak Mendietxe Museoa sortu du Azpeitian, Izarraitz Parke Naturalaren bihotzean, helburu bikoitzarekin: mundu mailan minoritarioa den horri balioa emateko eta Euskal Herrian grinaz bizi den kirola merezi duen bezala aterpetzeko. Alpinismoaz eta mendizaletasunaz ari gara, eta horretaz arituko da museoa ere, Alex Txikon alpinista eta Mendiaren Etxea elkarteko buruak asteleheneko inaugurazio ekitaldian aurreratu zuenez. Jesusen Bihotzaren Esklaboen komentu zaharrak hartu du museoa. XIX. mendeko eraikina da, eta erabat birmoldatu dute, mendizaletasunaren tenplu berriak eskatzen zuen beharretara egokitzeko. Hiru zati ditu Mendietxe Museoak: atzerabegirakoa, mendizaletasuna nola garatu den azaltzen duena hainbat objekturen bilduma iraunkor zabal baten bidez (eskiak, botak, pioletak, mazak...); Alex Txikonen bilduma pribatua, espedizioetako artikuluez osatua -Azpeitiko Lagun Onak Klubarena gehituta-; eta munduko hainbat ekosistemaren atzerabegirakoa, bere faunaren bidez, Ramon Garoz taxidermistak egindako animaliekin.