Zein dira Euskal Hirigune Elkargoak turismo alorrean garatuko duen estrategiaren ardatz nagusiak?

Hautetsiekin, profesionalekin eta gizarte zibilarekin elkarlanean osatu dugu estrategia. Turismoa ez da jada sektore bat soilik, politika publiko guzien bidegurutzea baizik: mugikortasuna, lurralde-antolaketa, garapen ekonomikoa, uraren eta hondarkinen kudeaketa… Lurralde-proiektuaren zerbitzura dagoen estrategia orokor bat da. Helburua klimarekiko konprometitua den turismoa eta baliabideen kudeaketa arrazionala da.

Ekintzen egutegirik baduzue?

Bai, 2040ra arte definituriko norabidea dugu, baina baita berehalako ekintzak ere. 2021az geroztik, hainbat neurri konkretu ezarri ditugu, ikuspegi estrategiko eta pragmatiko batekin.

Zein neurri berri etorriko dira?

Klima-konpromisoarekin loturiko ekimenen artean, baldintza ekologikoak ezarriko ditugu. Horrek erran nahi du turismo-etxebizitzen garapenerako laguntza landa-turismora eta barnealdeko eremuetan kokatuak diren hoteletara mugatuko dela, bertan eskaintza eskasa baita.

Beste proiektu zehatz bat karbono isuri apaleko mugikortasunari dagokio, Mugikortasun Sindikatuarekin elkarlanean. Baiona eta Donibane Garazi arteko tren ibilbide bat esperimentatuko dugu, eta ondotik Garazitik Atharratzera joateko aukera eskainiko dugu. Batez ere, bertako biztanleentzat izango da erabilgarri.

Bide beretik, ekoizpen-zirkuitu laburrak balioan ezartzen ari gara gastronomian. Tokikoa labelarekin, ostalariekin lan egin dugu eskaintza AOP, nekazaritza ekologikoa eta Idoki labelaren inguruan egituratzeko. Tokiko elikadura indartzeko egiturazko lana da.

Nola arautuko du Elkargoak turismoak ur eta hondarkinetan duen eragina?

«Turismo eta hondarkin» eta «turismo eta ur» behatokiak plantan ezarriko ditugu. Zenbait tresna konkretu baliatuko ditugu ur gehien kontsumitzen duten ostatu emaileak lagundu eta turismoaren ingurumen-inpaktua murrizteko.

Eta gertuko turismoaren inguruan?

Ibilbide lokalen plan berri bat garatzen ari gara, eta 2026ko udan neurri handi batean baliagarri izatea aurreikusten dugu. Esaterako, Zuberoan, heldu diren hilabeteetan mendiko bizikletentzako gune baten garapenean hasiko gara lanean. Helburua da turistak hobeto banatzea lurralde osoan zehar.

Euskal Elkargoak beharrezko finantzaketak ba al ditu aipaturiko proiektu hauek gauzatzeko?

Ekintza anitzek ez dute aurrekontu gehigarririk behar, lehendik dauden finantzaketak birbideratzea baizik. Adibidez, Donibane Garazi - Atharratze linea Mugikortasun Sindikatuak finantzatuko du; ez da eginen turismo funtsak baliatuz. Tokiko Ibilbide Planak 300.000 euroko inbertsioa eskatuko du, eta urteko 50.000 euroko mantentze-lanak beharko ditu.

Mugaz gaindiko turismoa onartu duzuen estrategiaren parte al da?

Bai, ardatz nagusietako bat da. Hego Euskal Herriko eragileekin ari gara lanean mugaz gaindiko fluxuen kudeaketari buruzko Europako proiektu baten baitan. Turismoaz haratago doa: kultura- eta hizkuntza-politika bateratu bat ere bada.

Zein turismo-eredu sustatu nahi duzue?

Turismo neurtua, arrazionala, lurraldea eta bere biztanleak errespetatzen dituena. Turismo orekatuagoa nahi dugu, ez hain kontzentratua, fluxuak hobeto banatuko dituena, parte-hartzaileagoa eta xumeagoa. Orain arte, bisitari kopuruan soilik definitzen zen turismo bat bagenuen, baina gaur egun, ingurumen, ur, hondarkin eta bizileku politiketan dituen ondorioen arabera neurtzen den turismoa da bilatzen duguna.

Sektoreko profesionalek zer erreakzio izan dute?

Batzuek pentsa dezakete estrategia hau idealizatua dagoela. Baina ez da utopia bat: politika publiko bat da, norabide argia ezartzen duena, turismoa guziontzat onargarriago izan dadin.

Euskal Herriko Turismo Bulegoaren parte ez diren herri batzuk badaude oraino. Zein da egoera?

Baionarekin elkarrizketak jarraitzen ditugu, bereziki, estatus berezia duelako, baita Donibane Lohizunerekin ere, bere turismo-politika moldatu nahi duelako. Erronka elkarrekin lan egitea da, lurralde osoan estrategia koherente bat ezartzeko.