Milaka lagunek bete zituzten atzo Bilboko itsasadarraren bi ertzak. ETSko Iñigok, Amaiak eta Arde Bogotak ur gaineko eszenatoki batean eskainitako emanaldiez gozatu zuten, BBK Fundazioak bere hamargarren urteurrena ospatzeko antolatutako doako ekitaldian. Bero itogarria egiten zuen arren, kontzertuak hasi baino ia bi ordu lehenago jada baziren gazteak itsasadarraren bi aldeetan, lekurik onena lortzeko zain. Han egon ziren, eguzkitik babesteko txano edota aterkiekin. 35 graduak gaindituta, Bizkaia abisu horian zegoen tenperatura altuengatik.