Izaskun Ugarte iheslari ohia eta GALeko biktimen mina ikusarazteko lan nekaezina egindakoa atzo hil zen, Bilbon, 76 urte zituela.

1983ko abenduaren 28an Mikel Goikoetxea “Txapela” hil zuen GALek bere bi alaba txikien eta Ugarte bere bikotekidearen aurrean, Donibane Lohizuneko bere etxe aurrean. Jordi Evoleren “Salvados” saioan, 2018an, honela deskribatu zuen unea: «Gure etxeko aparkalekura iritsi ginenean, haurra bere jostailuen saskitxoarekin joan zen, eta ni autoaren ondoan nengoen, Mikelen zain. Bat-batean, ‘klik, klik, klik’ bat bezalakoa entzun nuen barandan jotzen, eta pentsatu nuen salto egindako harritxoak zirela. Bat-batean zaborrak gordetzen ziren guneko atea irekitzen ikusi nuen, tipo beltzaran bat atera zen arma luze batekin eta tiro nola egiten zuen ikusi nuen. Esan nuen: ‘Mikel, Mikel!’ eta ez nuen gehiago ikusi. Lurrean zegoen. Hortik aurrera, ospitalea eta heriotza».

Adats luzeko emakume gazte hark sufrimenduaren zamari bere figura txikiarekin eusten ziola zirudien, bikotekidearen errautsak itsasoan zabaldu zituenean. Eta gaur egun, lau hamarkada luze igaro direnean, “Txapela” hil zuten tiroen zuloek hor diraute, hil zuten tokian ikusgai, haren heriotza oraindik argitzeke dagoela gogorarazi nahi balute bezala.

Bixente Perurena “Peru” eta Angel Gurmindo “Stein”-en gorpuak Hendaiako kale batean oraindik lurrean zeudela, amorruz baina patxadaz neska gazte batek CRS poliziengana jo zuen, “Egin”-ek kontatu zuenez. Galdera bat zeukan: «Gutako zenbat hil behar dituzue erreakzionatzen has zaitezten?».