«Goiz eder onetan erail bear nabe / txindor baten txintak gozotan naukela?», idatzi zuen Esteban Urkiaga “Lauaxetak”, frankistek Gasteizeko kanposantuko hormaren aurka 1937ko ekainaren 25ean fusilatu zuten bezperan. 32 urte zituen euskal kulturaren mugarri bihurtu zen kazetari eta olerkariak. Aurten 120 urte bete dira Laukizen jaio zenetik. Atzo bere izena daraman plazan egin zen ekitaldian inauguratu zuten “Harroa eta Sendoa” eskultura: 2 metroko hormigoizko egitura geometrikoa, burdinazko elementu batez lotua eta, erdian, gerraren hutsunea.