Mia Bannister emakume australiarrak tatuatuta darama Ollie bere semearen aurpegia. Gazteak bere buruaz beste egin zuen, sareetan jasandako jazarpenaren ondorioz. Hori dela eta, ama buru-belarri borrokatu da sare sozialak debekatzen dituen lege baten alde. Abenduaren 10etik aurrera, hamasei urtez azpiko gazteek ezingo dituzte Instagram, TikTok, Facebook eta Reddit sare sozialak erabili, Australiako Gobernuak berretsitako lege baten ondorioz. «Lege hori urtebete lehenago ezarri balitz, Ollie ziurrenik bizirik egongo litzateke», deitoratu du Ollieren amak. Olliek ziberjazarpena pairatu zuen nerabezaroan. Horrez gain, anorexia zuen: TikTok, Snapchat eta YouTube plataformetan anorexiara bultzatzen duten edukiak kontsumitzen zituen. Amak, gaixotasunaren berri izan zuenean, sare sozialetara jo zuen. «Ez nekien zer nolako eragina izan zezakeen horrek», adierazi du. Hala eta guztiz ere, legeak kritikak jaso ditu azken asteetan. «Gazteei betoa jarri beharrean, nahiago nuke plataforma horietan segurtasun baldintza gehiago ezartzea», adierazi zuen Catherine Page Jeffery Sydneyko Unibertsitateko irakasleak.