Sabine Weyandek 30 urte eman ditu Europar Batasuneko goi funtzionario lanetan. Aste honetara arte Merkataritzako zuzendari nagusia izan da, baina Europako Batzordeko presidente Ursula von der Leyenek Florentziara bidali berri du, klaseak ematera. Inork ez du arrazoiei buruzko zalantzarik Bruselan. Weyandek publikoki esan zuen denek zekitena: Von der Leyen ez zela Donald Trumpekin negoziatzen saiatu ere egin, europarren interesen aurkako akordio komertzial lotsagarria sinatu aurretik.