Ramiro Gonzalez Arabako ahaldun nagusiak aurkeztu zituen astelehenean Aiaraldeko Industria Garapenaren aldeko Mahaiak hausnarketa fasean adostutako ondorioak. Haien artean jasotzen da itun sozial bat sortzearen beharra.

«Denbora luzeegian kontakizun batzuek Aiaraldea zer den ezkutatu dute. Berriro hitz egin behar dugu enpresez, profesionalez, fabrikatzeko eta berritzeko dugun gaitasunaz eta eskualde honetan dagoen ezagutzaz. Eskualde industriala izatearen harrotasuna berreskuratu behar dugu», adierazi zuen Laudion.

Mahaian parte hartzen duten eragileek diote «enpresen eta sindikatuen artean gero eta mesfidantza eta urruntasun handiagoa» dagoela, eta, horren aurrean, «benetako negoziazioan, konfiantzan, gardentasunean eta plantillen parte-hartzean oinarritutako etengabeko elkarrizketa-eredu baterantz aurrera egitea» planteatzen dute.

Haien iritziz, «helburua da enpresen lehiakortasuna, eskubideetan aurrera egitea eta lan baldintzak hobetzea kontuan hartzeko esparru bat eraikitzea».

ADMINISTRAZIO BANAKETA

Elkarrekin Arabak ez zituen babestu mahaian adostutako ondorioak eta langileen borroka goraipatu zuen; eta EH Bilduk atzo argi utzi zuen adostutakoa ez dela «Aiaraldea biziberritzeko behar den ibilbide-orria». Hala ere, pozik agertu zen aurkeztu dituen 80 proposamenetako batzuk islatuta ikusten dituelako eta, beraz, bertan parte hartzen jarraitzeko konpromisoa hartu zuen, «mahai hori Aiaraldeko biztanleen errealitatera hurbiltzeko», eskualde osoari, bai Araban diren herrietan bizi direnei, baita Bizkaian bizi direnei ere.

Ildo horretan, EH Bilduk eskualde mailako beharrezko ikuspegia azpimarratu zuen, banaketa administratiboa gaindituz. «Gure ustez, ezinbestekoa da inbertsioak Aiaraldearen ikuspegi orokorrarekin koordinatu eta bideratuko dituen zuzendaritza estrategikoa, banaketa administratiboa gaindituz».

Ohar batean azaldu zuenez, azken testuan jasotzen diren EH Bilduren proposamenen artean, Aiaraldeko Eskola Mapa eguneratzeko beharra dago, eskualde naturaleko Lanbide Heziketaren plangintza egiteko, hau da, Bizkaiko herriak barne hartuko dituena. Industria lurzoruaren kudeaketa koordinatzea ere proposatu du EH Bilduk, erakunde publiko batek kudeatuko duen udalaz gaindiko industrialde baten bidez.