Sevilla II espetxeko euskal presoek 28. eguna dute gaurkoa ezer jan eta edan gabe. Atzo jakitera eman zenez, hotz handia pasatzen ari dira; besteak beste, kartzelako arduradunek berogailuak itzali egin dituztelako. Roberto Lebrero gasteiztarraren kasuan, senideek salatu dute lo egiteko manta ere kendu egin diotela.

Gizartea egoera horretaz ohartarazteko eta presoenganako elkartasuna adierazteko manifestazioa antolatu zuen atzo Etxeratek Iruñean, «giza eskubideen aurka espetxeetan egiten den jazarpena» salatuz. Estatu espainolak urratsak egiteko azaldu duen «borondaterik ezaren» aurrean, gizarteari dei egin zioten oinarrizko eskubideen alde borrokatzera.

Etxeratek adierazi zuenez, Madrilgo Gobernua ez da nor «zigor edo sari moduan giza eskubideak kentzeko edo emateko, giza eskubideak bakeari atxikita doazelako». Alde horretatik, gaineratu zuen bakearen bidea irekita geldituko dela giza eskubideak errespetatzen direnean.

Ekitaldian Sortuk parte hartu zuen. «Borroka honi ekin diote oso gogorrak diren baldintzen aurka protesta egiteko. Hau ez da kasu bakan bat, baizik eta araua espetxe politika honetan», adierazi zuen alderdiko bozeramaile Amaia Izkok.

«Gobernuak indarra erabiltzen du presoen aurka, horiek higatzeko eta bake prozesua oztopatzen saiatzeko». Izkok PPren Gobernuari presoen aurkako indarkeria alboratzeko eta salbuespenezko neurriak bertan behera uzteko eskaera egin zion. Gainerako alderdi politikoei, bestalde, gai honi dagokionez ez dezatela gehiago «beste aldera begiratu» eskatu zien.

Baraualdiak deitu dituzte

Orain ia hilabete abiarazi zuten gose greba Iker Agirre, Gurutz Agirresarobe, Asier Arzalluz, Juan Mari Etxebarri, Jesus Goikoetxea, Juan Lorenzo Lasa Mitxelena, Roberto Lebrero eta Koldo Apariciok. Azken hau, hain justu, atzo goizean geratu zen aske, hemezortzi urteko espetxe zigorra bete ondoren.

Garikoitz Etxeberriak ere ekin zion protestari, baina hiru asteren ondoren, osasun arazoak zituela-eta, utzi egin behar izan zuen, Urtzi Paul eta Manu Gonzalezek bezala. Gonzalez asteazkenean libre gelditu zen, Estrasburgok 197/2006 doktrinari buruz igorritako ebazpena aplikatu baitiote. Azkenik, Javi Agirrek eta Iñaki Arakamak, arrazoi ezberdinak direla medio, ezin izan zuten baraurik egin.

Presoen borrokaldiak erantzun handia jaso du Euskal Herrian eta babesa agertzeko ekintza ugari egin dira. Datorren astean ere izango dira mobilizazioak. Adibidez, Gasteizko campusean Ernaik aste osoko baraualdia egitera deitu du, eta gaur bertan Lizartzan manifestazioa egingo dute, 18.30ean.

Borrokaldia beste espetxe batzuetara ere zabalduko da, Picassent-era kasu. Bertan dauden euskal presoek baraualdi bat egingo dute Sevilla II-ko euskal herritarrei babesa agertzeko.