Kultur areto bat izatearen garrantziaz jabetuta, Lekeitioko Udala parrokiarekin harremanetan jarri zen eta horren jabetzakoa den aretoari erabilera ematen jarraitzeko aukerez mintzatu ziren. Gauzak horrela, 2013ko irailean alokairu kontratu bat sinatu zuten bi aldeek. Honenbestez, Udalak, 2017ra arte aretoaren erabilera osoa bereganatu zuen. Kultur espazio bat mantendu eta herriratzea lortu zen horrela. Zinemazaleak beren aldetik antolatzen hasi ziren eta proiektua definitu eta elkarte bihurtu ziren.