Avironek bolada onari eusteko aukera paregabea izango du gaur arratsaldean, Montpellier hartuko baitu, 18.30ean Jean Dauguer estadioan. Zuri-urdinek gaur beste lau puntu lortuko balituzte, sailkapeneko goialdean kokatuko lirateke, eta ondorioz aurkari zuzenak atzean uzteko modua egingo lukete.

Avironi primeran etorri zitzaion pasa den asteko garaipena; horri esker lasaiago ekingo dio gaurko partidari, galduta ere tarte bat baduelako atzeko taldeekiko. Dena dela, eta kontuan hartuta zuri-urdinek etxetik kanpo oso puntu gutxi lortu ohi dituztela, gaur beharrezkoa izango dute garaipena lortzea, bestela kanpoan irabaztera behartuko lukete beren burua, eta azkeneko denboraldiak kontuan hartuta, ez du itxaropenerako tarte handirik uzten.

Stade Toulosainen aurka egin zuten partida handia eta gero, zaleak oso gustura eta itxaropen handiarekin etxeratu ziren. Aurtengo denboraldiko partidarik onena egin zuten. Entseguak aspaldian ez dituzte hain erraz egin, eta ostikoekin Stewart azkenaldian bezain fin aritu ez bazen ere, garaipen handia lortu zuen Baionako talde zuri-urdinak.

Horrek gaurko ikusmina handitu du. Zaleek gauza bera ikusteko itxaropena dute, eta honekin azken urteetan ez bezala sailkapeneko goialdean jartzeko aukera ere izango luke taldeak. Alabaina, ez da ahatzu behar galduko balu, berriro ere atzeko taldeetatik oso gertu jarriko litzatekeela. Aviron oso indartsua da Jean Dauguerren, eta jendeak gaur lau puntu Baionan geratuko direla ziurtzat jotzen du; beraz, jokalariek ezin dute gaur hutsik egin.

Avironen deialdian, jokalari hauek sartu ditu Noriega entrenatzaileak: Igiñiz, Pointud, Van Rensburg, Arganese, Etrillard, Jgenti, Muller, Chisholm, Fa'aoso, Senekal, Taele, Haare, Monribot, Fonua, Olivon, Loustalot, Rouet, Otazo, Stwart, Fernandez, Ugalde, Rokocoko, Bustos Moyano, O'Connor, Speding eta Elisalde. Epailea, berriz, Mathieu Raynal izango da.

Ohorezko Maila

Ohorezko Mailan, euskal derbia izango da gaur ikusgai Faduran, Getxoren eta Hernaniren artekoa; 17.00etan. Etxekoak partida bat irabazi eta bi galduta iritsiko dira gaurko neurketara, eta, hortaz, irabaztera behartuta daude gipuzkoarrak mendean hartuta. Hernani, berriz, hiru partida galduta helduko da derbira, nahiz eta azken partidan puntu bat eskuratu ahal izan zuen. Biak helduko dira puntuak eskuratzeko premiarekin, nahiz eta kanpokoen beharra handiagoa izango den.

Bizkaia Gernikak ere gaur arratsaldean jokatuko du. Madrilen arituko da Pozueloren aurka, 16.00etan. Bizkaitarrek denboraldi hasiera txukuna izan dute eta garaipenaren bila joan dira. Punturen bat lortzea ez litzateke batere txarra izango.

Biharko, berriz, partida bakarra geratuko da. 12.00etan, Ampo Ordiziak Independiente Santander hartuko du Altamiran. Gipuzkoarrek partida zaila daukate, talde handi bat izango baitute aurrez aurre. Kantabriarrak oso maila onean ari dira jokatzen, eta lau puntuak garrantzitsuak izango dira.