Mikel Larrañagak irabazi zuen herenegun Asteasun jokatu zen Euskal Herriko Bigarren Mailako finala, eta berarekin batera, Ugaitz Mugertzak lortu zuen datorren urtean Lehen Mailan aritzeko txartela.

Jende asko batu zen Asteasuko pilotalekuan, nahiz eta harmailak ez ziren erabat bete. Aizkolari bakoitzak bi kana-erdiko, bi 60 ontzako eta bi oinbiko erdibitu behar izan zituen. Lehen Mailako finalean izaten duten lanaren erdia izan zuten.

Finala oso polita izan zen, eta kanporaketako lehen bi postuak errepikatu egin ziren. Dena dela, Larrañagak eta Mugertza II.ak oso borroka handia izan zuten, baina azpeitiarrak oso ongi amaitu zuen, eta mutrikuarra, aldiz, bete egin zen, eta Txapartegik asko estutu zuen amaierako enborretan.

Mikel Larrañaga ez zen ongi hasi, baina apurka-apurka gora egin zuen. Mugertzak hasiera bikaina eman zion saioari, eta bien artean dema ikaragarria izan zuten. Azkeneko oinbikotik nahiko beteta atera zen mutrikuarra, eta azpeitiarrak ez zuen barkatu. Amaieran minutu erdiko aldea kendu zion Larrañagak Mugertza II.ari.

Behin lehen postua lortzeko aukerak galduta ikusi zituenean, Mugertzaren asmoa bigarrengoari eustea zen, horrek ere sari potola baitzuen. Baina, atzetik Txapartegi zetorren abiada bizian. Aizarnakoa zen finaleko beteranoena, eta maila nagusian aritutako bakarra, gainera. Txapartegi Lehen Mailan final bat baino gehiago jokatutakoa ere bazen, eta berak ere nahi zuen iaz galdutako maila berreskuratu, baina ez zion denborarik eman, eta amaieran hirugarren postu horrekin konformatu behar izan zuen.

Berandu

Luix Txapartegi hirugarren aritu zen ia saio osoan, eta azkenean bere erreakzioa nahiko berandu iritsi zen, bestela agian beste posturen bat ere lor zezakeen. Mugertzak, ordea, bere helburuetako bat bete zuen. Txapela ez zuen eskuratu, baina bai bigarren postua, eta horrekin datorren urtean Lehen Mailan aritzeko txartela lortu zuen, eta horrekin gustura amaitu zuen. Bai Larrañaga eta bai Mugertza II.a ere lehen aldiz arituko dira datorren urtean Lehen Mailan. Txapartegik bukatu zuen hirugarren postuan, eta honek dagoen lekuan jarraitu beharko du.

Eneko Otaño ikusteko gogoa ere bazegoen. Beizamakoak Larrañagaren aurkako apustua dauka hemendik hiru astera, eta nolako tartea egongo zen ikusi nahi zuen jendeak. Horrekin gutxi gorabehera erreferentzia bezala erabili ahal izateko, eta amaieran bi minutu eta erdiko tartea egon zen. Otañok 60 ontzako baten aldea dauka, eta hori gainera berak jarriko du, beraz, herenegungo finalekoa errepikatzen baldin bada, gauzak estu joan daitezke Azpeitian jokatuko den apustuan.

Eneko Otañok berriro ere itxura ona eman zuen. Behetik gora egin zuen finalean aritu zen aizkolaririk gazteenak, oraindik 20 urte besterik ez baititu, eta horiek ere bete berriak ditu. Garbi dago behetik gora sekulako abiadan datorrela, eta hemendik aurrera zeresan handia emango du.

Jauregik bosgarren amaitu zuen. Arabarrak goitik behera egin zuen. Ongi ekin zion finalari, baina behera egin zuen, eta amaieran bosgarren postu horrekin amaitu behar izan zuen Ilarduiako aizkolariak.

Mugertza III.ak itxi zuen sailkapena. Mutrikuarra saio osoan zehar azkeneko postu horretan ibili zen, eta amaitu ere hortxe egin zuen, eta txapela jantzi zuen Larrañagak amaieran ia sei minutuko tartea kendu zion. Finala bera orokorrean ona izan zen, izan ere, aizkolariek maila oso ona erakutsi zuten. Garrantzitsua izan zen baita ere gazteak ikustea, izan ere, Txapartegi kenduta, gainerako aizkolari guztiak oraindik gazteak dira. Atzoko finalean ziren aizkolari bat baino gehiago urte asko baino lehen maila nagusiko finaletan ere izan beharko lirateke, baina pauso hori ere eman beharko dute, ez baita erraza izaten onenen artean sartu, eta haiek estutuz finalean sartzea. Dena dela, itxura bikaina duten gazte asko daude hor goian, eta zaleek itxaropen handia dute beraiengan, nahiz eta pazientzia izatea oraindik denentzat beharrezkoa izango den.