Tubacex Innovacion, Cidetec, CIC Energigune, EHU, Tekniker, Petronor Innovacion eta Energia Klusterrak osatutako partzuergoa, Tecnalia buru duela, EAEn hidrogeno berdea sortzeko teknologiak garatzen ari da.

«Hidrogeno berdea ekoizteko teknologiak eta soluzioak garatzea eta hobetzea» du xede proiektuak, halako hidrogenoa «era lehiakorragoan» lortzeko, energia berriztagarriak erabiltzen laguntzeko eta eskala handian fabrikatzea lortzeko kostuak murrizteko.

«Hidrogenoak ekonomia deskarbonizatzen laguntzeko ahalmen handia duenez, funtsezkoa izango da trantsizio energetikoan; bereziki, elektrifikatzeko zailak diren sektore eta prozesuetan», azaldu dute. Aurreikuspenen arabera, «lehengai gisa erabiliko da hainbat alorretan: industria kimikoan, sektore industrialen deskarbonizazioan, mugikortasunean...».