1

Hara Negu Gorrizko

egunek zenbat gau;

zenbat izango gara

hiru, bost, hamalau?

Urrutiko intxaurrak

gerturatu ta lau

noiz berrituko dugu

esaera zahar hau?

2

Nafarroa Arena,

BEC edota Kursaal

nahiz ez izan kultura

globalen sukurtsal

pluralean bakan ta

bakanean plural

hemen zer da kultura

eta zer da euskal?

3

Urdaibain Guggenheim bat

turisten gose da

kultura bat ez denez

mugatzen posera

ingelesez sortua

badu atmosfera

zein da elikatuko

duen biosfera?

4

Autogestioaren

kontra zakur zaunkak,

biralizatutako

gau bateko mahukak,

managerren enpresa

erraldoien pautak…

Zer erosi eta zer

saltzen du Sold Out-ak?

5

Makurtu ez den herri

honen lunbalgia,

gaur berrogei urteko

garaien magia

nekatu gabe nahiko

genuke plagia;

kultur proiektu on bat

al da nostalgia?

6

Ez banaute hornitzen

hiru-lau lan gorik

autonomoen kuotak

patrika jango dit

lokatzetan ez baita

bermatzen zangorik

abendutik harago

ba al da Durangorik?

7

Nahiz ardoa mindu zen

gure pitxarretan

gure eztabaidetan,

lubaki zaharretan

ume bat jolasean

dabil izarretan

harrizko herri honen

harri txintxarretan.

8

Kantatzen den herri bat

ez den arren hilko

beti ez ditugu hitz

berak ibiliko

eztarri hauskorrenak

ez daitezen ito

partitura berriak

sortu eta kito.