Iker Irribarria eta Jose Javier Zabaleta dira Binakako Txapelketako lehen finalistak Bilbon Elezkano-Rezustari uste baino errazago (12-22) irabazi ostean. Emaitza honekin, ez dago kalkulu handiegirik egin behar eta apirilaren 7ko partidarako beste txartela Donostian Altuna-Martija eta gaurko galtzaileen artean banatuko da.

Lehia orekatua espero zen Bizkaia pilotalekuan eta partidak hasiera parekatua izan du. Danel Elezkanok oso gogotsu eta bizi ekin dio partidari eta gorriek euren lehen helburua bete dute, hau da, urdinek ohikoa duten hasiera esplosiboari eustea. Irribarriak ez du gehiegi asmatu errematean eta Zabaleta ere deseroso aritu da kantxan, lentillarekin ere arazo bat izan du eta.

Rezustak ere txispaz ekin dio eta, gauzak horrela, markagailua nahikoa orekatua joan da zazpinako berdinketara arte. Hortik aurrera, ordea, Iker Irribarriak asko asmatu du ezker gantxoarekin, ederki sartu da izan dituen aukeretara eta jotzaile huts bat baino askoz gehiago ere badela erakutsi du Aramakoak. Zabalean botatako dejada bikain batez harago, 10 tanto lortu ditu ezker airez eta berak hautsi du ordura arte berdindua joan den partida.

Danel Elezkano, aldiz, erabat irten da partidatik eta gorriei nahi baino errazago alde egin die partidak, baina igandean Anoetan beste aukera bat izango dute finalean egon ahal izateko.