LAB sindikatuak salaketa aurkeztu du Bilboko goardiako epaitegietan, Santa Marina Ospitaleko eta Bilbo-Basurtu ESIko gerente ohiek egindako txertaketaren harira. «Gertaera honek erantzukizun pertsonalak eta politikoak ez ezik, penalak ere badakartza», adierazi du sindikatuak ohar baten bidez.

Zentzu horretan «ondasun publikoen administrazio desleiala», «bidegabeko jabetza», «angileen eskubideen aurkako ekimena», «prebarikazioa», «eragin-trafikoa», «bidegabeko erabiltzea» eta «funtzionario-eroskeria pasibo desegokia» delituak izan daitezkeela azpimarratu du LABek.

Sindikatuak «lan-eskaintza publikoko azterketetako filtrazioen esperientzia ikusita», Osakidetzak edo Osasun Sailak egin ditzaketen barne-ikerketetan «ez dugula inolako konfidantzarik» azpimarratu du. Horren aurrean, justiziara jotzeko beharra ikusi du,  «gertatutakoa argitzeko eta era guztietako erantzukizunak argitzeko modu bakar gisa».

Izan ere, LABek dimisioetatik haratago joatea eskatzen du. «Ikerketa inpartzial bat eskatzen dugu, gertaerak nola gertatu diren argitzeko, mota guztietako erantzukizunak argitzeko eta praktika hori beste ESI batzuetan gertatu den eta hori egin behar ez zuten pertsonak txertatu diren argitzeko, beren boterea edo kargua baliatuta». Jokabide honen bitartez «lehenengo lerroan aritzen diren langileak kaltetu» egin dituztela deitoratu du sindikatuak, gaur egun dagoen txerto eskasia kontuan hartuta.

Honela, «Osakidetza goitik behera demokratizatzeko inoiz baino behar handiagoa» dagoela iritzi du LABek eta «gure osasun-sistema publikoaz eta milaka langileen osasunaz benetan arduratuko diren buruzagitzez hornitzeko premia larria».