Antolatzaileek ohar baten bidez jakinarazi dutenez, azken bi edizioetan bezala Irisarrira itzuliko da aurten Euskal Herria Zuzenean festibala, uztailaren 1etik 3ra ospatuko baitute 26. edizioa. 

Gogoratu dute iazko edizioa, testuinguru berezia izan arren, arrakastatsua izan zela Irisarrira hurbildu ziren ehunka laguntzaileei eta jaialdian parte hartu zuten milaka pertsonei esker. «Festibalaren mende laurdena behar den bezala ospatu genuen», nabarmendu dute. 

26. edizio honi begira, dozena bat batzordetako kideak lanean ari dira dagoeneko hitzordu «ahaztezin» bat prestatzeko: : nazioarteko eta Euskal Herriko artistak, partaidetza berriak, ikusgarriak, mintzaldiak... Datozen asteotan joango dira xehetasun gehiago ematen.

Martxoaren 26an Biarritzen 

Uztaila oraindik urrun dagoela jakinda, ordura arte itxaron nahi ez dutenentzako hitzordua prestatzen ari dira: martxoaren 26an Biarritzen ospatuko duten ‘EHZ Udaberria’ ekimena. Arratsaldeko 17.00etan Amets Arzallusek eta Marc Parramonek zuzendutako ‘Altsasu (gau hura)’ dokumentala proiektatuko dute Le Royal zinema aretoan, eta ondoren solasaldia egongo da Arzallusekin.

Poteo alaitu batek emango dio segida egitarauari eta gaualdia Mizanbu gaztetxean amaitzeko. «Arratsean zehar zenbat sorpresa ere izanen dira», antolatzaileek aurreratu dutenez.