Biziegia izango ez ote den beldurrarekin amaitu dute behintzat Oinatz Bengoetxeak eta Alvaro Untoriak. Espero zen bezala, pilota biziagoak aukeratu dituzte beteranoenek eta nafarrak eta errioxarrak, aldiz, «behetik gehiago ibiltzen diren horietakoak».

Gainerakoan dena prest da igandeko egun handirako, baita horrenbeste buruhauste ekarri dizkion Aitor Zubietaren ezker eskua ere. Etxarrikoak asteartean egin zuen proba serio bat, atzo ere ezkerrez astindu zuen pilota eta, igandean, «ohikoa baino tako gehiagorekin» jokatuko duela onartu duen arren, «hasi behintzat, ondo egingo dut finala».

Orain hilabete eskas, pilotaleku berean Bengoetxea VI.a-Untoriak 22-9 irabazi bazuten ere, pilotalekuan ziren artekarien arabera, dirua parean irtengo da, beraz, ez dago faborito garbirik pilotazaleentzat.