Aitor Sarriegi garaile Iruñeko finalaurrekoan eta Unai Agirre finalera sailkatuta

Iruñeko finalaurrekoaren ostean Amets Arzallus, Maialen Lujanbio, Beñat Gaztelumendi, Aitor Sarriegi, Aitor Mendiluze, Unai Agirre, Igor Elortza eta Sustrai Colina izango dira abenduaren 17an Barakaldoko finalean. Aitor Sarriegi izan da garaile Anaitasunan.

Amagoia Mujika|IRUÑEA|2017/12/02 20:03|0 iruzkin
Int20171202015819
Azken finalaurrekoan Aitor Sarriegi izan da garaile. (Iñigo URIZ / ARGAZKI PRESS)

Iruñeko finalaurrekoak bazituen oso berezi egiten zuten osagaiak: azkena, Iruñeko Anaitasuna plaza apartekoan, BECeko finalean kantatuko dutenen zerrenda itxi duena... Euskararen Egunaren bezperatan, euskarari aparteko plaza eskaini diote 2.700 bertsozalek Iruñean. Finaleko zortzigarren aulkiaren dantzan jarriak zeuden begi guztiak, kalkulagailuak sutan. Azkenean, Unai Agirrek goitik beherako saio bat egin eta beretzat finalerako txartela.

Benetan hunkigarria izan da puntuak entzuteko momentua. Plazak gora altxatu du finalista berria eta Unai Agirrek, bertsolaritzan bide luzea eta oparoa egina duen hernaniarrak, ez die malkoei eutsi.

Hartara, Barakaldoko finalean honako zortzi bertsolariek kantatuko dute: Amets Arzallus, Maialen Lujanbio, Beñat Gaztelumendi, Aitor Sarriegi, Aitor Mendiluze, Unai Agirre, Igor Elortza eta Sustrai Colina. Iruñeko Anaitasunak bertso lapiko baten antza hartu du arratsalde osoan barna. Saio ona izan da, bertsolariak askotan iritsi dira zuzen entzulearengana eta bero joan da arratsaldea, barruan behintzat.

Azkenean, Iruñeko puntuazioa hauxe izan da:

698,5 Aitor Sarriegi
696,5 Aitor Mendiluze
696 Unai Agirre
652 Miren Amuriza
649,5 Alaia Martin
646 Oihana Iguaran