Orwell: 2+2=5” dokumentalak George Orwellen azken urteak aztertzen ditu, eta, batez ere, haren lanek -bereziki “1984” eleberriak- nola jarraitzen duten eragina izaten gure pertzepzio politikoan, gizartean eta hedabideetan. Zinema izan da, ziurrenik, unibertso orwelliarrei bizia emateko bide boteretsuenetako bat.

“1984”-ren lehen egokitzapenetatik hasi, 50eko eta 60ko hamarkadetako bertsioetatik igaro eta gaur egungo berrinterpretazioetaraino, mundu osoko zuzendariek Orwellen kontakizunak ispilu gisa erabili dituzte kontrol soziala, zentsura eta askatasun indibidualen urraketa aztertzeko.

Besteak beste, “Brazil”, “Blade Runner”, “V for Vendetta” edota “Black Mirror” telesail eta filmek asko zor diote Orwellen ikuspegi kritikoari. Halaber, zientzia fikziozko lanek eta thriller politikoek gizarte zelatatuek eta norbanakoek sistema zapaltzaileen aurka duten borroka nola bizitzen duten erakusten dute.

Orwellen obrak bere bizipen pertsonalen arrastoak islatzen ditu etengabe: gaztetan, Birmanian kolonia ordenaren ordezkari gisa betetako postuaren ondorioz, britainiar inperialismoaren aurkako konpromisoa garatu zuen; Londres eta Parisko langileriaren bizi baldintzak ezagutu eta gero, sozialismo demokratikoaren alde egin zuen; eta 36ko Gerran parte hartu ondoren, totalitarismo nazi eta estalinistaren aurka agertu zen.