Bizkaiko Aldundiak ohar baten bidez jakinarazi duenez, Bizkaibizi zerbitzuaren bizikleta publikoak txirrinda elektrikoentzat geltoki berriak izango dituzten bederatzi udalerrien artean mugitzeko erabili ahal izango dira.

Zehazki, zerbitzua Barakaldon, Berangon, Bilbon, Erandion, Getxon, Leioan, Portugaleten, Santurtzin eta Sestaon ezarriko da. Guztira, 700.000 biztanle baino gehiago biltzen dituen eremua da, eta gutxienez 600 bizikletaz eta 80 geltokiz hornituko da zerbitzua, ainguratzeko eta elektrizitatea kargatzeko guneekin.

Miguel Angel Gomez Viar Bizkaiko Garraioko eta Mugikortasuneko diputatuak azaldu duenez, «helburua da bizikleta garraio publikoko sistema berri bat bihurtzea Bizkaian, lehendik daudenekin bat egin eta osatzeko».

Ostiral honetan jakinarazi dutenez, dagoeneko onartu dira Bizkaiko Aldundiaren eta bederatzi udalen arteko Lankidetza Hitzarmenaren arteko akordiotik sortutako ekimen hau ezarri, mantendu eta kudeatzeko zerbitzuak kontratatzeko oinarriak.

Horrela, irekita geratzen da zerbitzuak emateko kontratua, 7.380.000 euroko oinarrizko aurrekontuarekin eta 2026ko abendura arteko iraupenarekin. Proposamenak aurkezteko epea 45 egun naturalekoa izango da, Europar Batasunaren Aldizkari Ofizialera (EBAO) bidaltzen denetik zenbatzen hasita.

Eskaintza ekonomikoa da pisurik handiena duen esleipen-irizpidea, puntuazioaren % 40 izango baita; gainerako % 60arentzat, osagaien kalitatea eta bizikleten ezaugarri teknikoak hartuko dira kontuan, besteak beste. Kontrataziorako, positiboki baloratuko dira bizikletak muntatzeari eta mantentzeari lotutako prestakuntza-akordioak.

«BizkaiBizi zerbitzua kontratatzeko oinarriak onartuta, urrats garrantzitsua eman da Bizkaian eta, bereziki, metropoli-eremuan bizikleta bidezko mugikortasuna sustatzeko helburu estrategikoan», nabarmendu du diputatuak.