Urkullu hainbat gazterekin elkartu da Bilboko Pedro Arrupe Pasabidean eta bertan hiru konpromiso helarazi dizkie: partekatuta alokatzeko 1.000 etxebizitza eskaintzea, 5.000 enpresa Prestakuntza Dualeko programan parte hartzea bultzatzea eta «gazteak Euskadira itzultzeko plan berezia» abian jartzea.

«Emandako hitza beteko dut», adierazi die Urkulluk. Bizkai Buru Batzarreko presidente Itxaso Atutxa eta Bizkaiko zerrendaburu Josu Erkoreka ere bertan izan dira, beste hautagai batzuekin batera.

Berrautaketarako hautagaiak azpimarratu du «gizarte politikarik onena» enplegua sortzea dela eta, horregatik, lanpostu «gehiago eta hobeak» sustatzea EAJrentzat «lehentasuna» izango dela gaineratu du.

Enpleguarekin batera, emantzipazio alorrean, hautagai jeltzaleak hitzeman du gazteei eskainiko zaizkiela Alokabidek diruz lagundutako 1000 etxebizitza, partekatuta alokatu ahal izateko.