Bernard Cazeneuve Barne ministro frantsesa Euskal Herrira dator gaur, eta bisita honen harira Euskal Herria Bai koalizioak oharra igorri zuen atzo, non «Euskal Herriarentzat biziki garrantzitsuak diren bi gairen inguruan» interpelazioa egin zioten ministroari.

Alde batetik, gogorarazi diote Estatu frantsesak «Ipar Euskal Herriaren garapen egonkorra bermatzeko, beharrezkoa eta lurraldeari egokitua den instituzio bat» eman behar diola, betiere «herritarren iritzia eta eskaerak kontuan hartuz». Bestetik, gatazkari dagokionez, Gobernu frantsesaren ordezkariari eskatu diote «gai honen inguruan daraman estrategia gelditu eta aldaketa oso bat ematea», gatazkaren konponbidearen prozesuan «zuzenki eta modu eraikitzaile batean inplikatuz».