Hiru egun eta hiru gau iraun ditu Ernai eta Aitzina gazte antolakundeek prestatutako aurtengo Gazte Danbadak. Gaur kanpalekua jasotzeko lanak nagusituko dira Laudion. Izan ere, herria txukun utzi nahi dute gazteek.

Baina atzo ederki aprobetxatu zituzten orduak egun osoan izan zituzten ekitaldi guztiekin. Goizean goiz tekno-txaranga ibili zen herrian barrena eta haiekin gorputza martxan jarri ostean zumba herritarra dantzatu zuten. Eguerdi partean hasi ziren hitzaldiak (trantsizio energetikoa, geopolitika...) eta tailerrak (aire zinta, ogia...).

Xabier Silbeirak, Jokin Urangak eta Fredi Paiak prestatutako “Zarrak berri xou” bertso-poteoaren azken hitzekin batera amaitu zen egitarauko azken lerroa. Ondoren, festarekin jarraitu nahi zutenek karpa handiko zein oholtzako kontzertuetara jo behar izan zuten: Ken zazpi, Belako, Gose, Sei Zoro...