Iruñeko Udaltzaingoak 20 urteko neska bat bortxatzea leporatuta atxilotu zituen larunbat goizaldean bi mutil, J.P.A.G, 26 urteko iruindarra, eta M.J.V.D.J, Eguesen bizi den 21 urteko gaztea. San Juan auzoan, San Roke kalean, gertatu zen antza erasoa. Telefono dei batek ohartarazita hurbildu ziren poliziak eta biktima topatu zuten beste neska batzuekin. Bertan bildutako jendeak erasotzaileetako bat atxikitzea lortu zuen Udaltzaingoa iritsi arte eta beste erasotzaile baten deskribapena eman izanak balio izan zuen hura ere harrapatzeko hurbileko kale batean, auto artean ezkutatuta. Genero indarkerian espezializatutako poliziek biktimari lagundu zioten.