Oraindik ligaxka bukatzeko jardunaldi bat falta bada ere, dagoeneko ezagutzen dira Euskal Herriko Bote Luzeko txapelketaren finalerdietan –hilaren 16tik 18rako asteburuan– arituko diren lau taldeen izenak. A multzoan Gipuzkoa 1 eta Lapurdi 2 izan dira hurrengo faserako txartela eskuratu dutenak, azken talde honek Donapaleun 6-10 menderatu baitzuen Nafarroa Behereko taldea, aukerarik gabe gelditu dena. B multzoan, berriz, Lapurdi 3-k galdu egin zuen Itsasun Gipuzkoa 2-ren aurka (3-10), eta azken hau finalerdian egongo da Lapurdi 1-ekin batera.

Txapelketako hirugarren jardunaldiko ordutegiak ere eman dira jada ezagutzera eta orduan jakingo dugu multzo bakoitzeko lehen postua norentzat den. Lapurdi 2 eta Gipuzkoa 1 larunbat honetan neurtuko dira, 11.00etan Saran; eta Gipuzkoa 2 eta Lapurdi 1 aurkariak izango dira igandean, Villabonan, 10.30etik aurrera.