Hilabete pasatxo iraun du aurtengo inauteria garaiak Euskal Herrian, baina atzo sardinak erre, txaranga doinuak isildu eta azkeneko dantzak egiteko ordua heldu zen. Orri honetara ekarri ditugun argazkiak bi herri- inauteri ezagunenetarikoei dagozkie, biak nafarrak: Lantzeko ospakizuna ageri da goian eta ezkerreko bi irudietan, eta Altsasukoa eskuinekoetan. Miel Otxin, Ziripot, zaldikoak, ferratzaileak eta txatxoak jaun eta jabe izan ziren Ultzama aldean egunez, ilunabarraren ostean Miel Otxin lapurrari su eman aurretik. Altsasu, bitartean, momotxorroen, akerraren eta sorginen joan-etorri urduriek astindu zuten.