ELEZKANO II.A-REZUSTA 22

ALTUNA III.A-MARTIJA 12

Danel Elezkanok eta Beñat Rezustak poltsikoan dute finalerdietarako txartela, ostiral gauean Jokin Altuna eta Julen Martijari 22-12 irabazi eta zortzigarren garaipena –seigarrena segidan– lortu ostean. Sailkapeneko bi bikote onenen arteko deman ez zen espero zen parekotasunik izan, eta gorriak argi nagusitu ziren Urdulizen. Hori bai, partidaren hasiera ikusgarria izan zen. Erritmo ikaragarrian jokatu ziren aurreneko tantoak eta markagailua nahiko berdinduta mantendu zen 6-7kora arte. Rezusta eta Martija egurrean atzean, eta Elezkano eta Altuna elkarri tantoa sartu nahian aurrean. Hortik aurrera, ordea, Rezusta nabarmen nagusitu zen atzean eta Elezkanok kolore guztietako erremateak amaitu zituen, 16 guztira. Eta adi, Altuna-Martijak oraindik lanean segitu beharko dutelako.