Musika Bulegoa Sarien hirugarren edizioan Gabriel Erkoreka, OCNEk (Orquesta y Coros Nacionales de España) eskainitako “Carta Blanca” lanagatik, Elkano Browning Cream taldearen “Bor Bor” lana, Atom Rhumba taldearen “Cosmic Lexicon”, Izaroren “Eason” diskoa eta Tosta Bandaren “Tosta” proiektua txalotuko dituzte.

Era berean, Ehmbe sari berezia Juan Mari Beltranek jasoko du “Soinuetxea-Herri Musikaren Txokoa” proiektuarengatik, «egin duen sustapen, formakuntza eta zabalkunde lanagatik, ez musikari bezala bakarrik, ikertzaile bezala ere bai». Bestalde, egin duen Euskal Herriko herri musikaren ikerketa eta dokumentazio lana ere txalotu nahi izan du epaimahaiak.

Kalakan ere saritua

Era berean, Etxepare Euskal Institutuaren Musika Saria Kalakan taldearentzat izango da «indarra, kalitatea, adierazkortasuna eta benekotasuna» transmititzen dutelako eta «Euskal Herriko musikaren erroak nazioartekotzeagatik».

Sari banaketa astelehen arratsaldean izango da Iruñeko Baluarte Auditorioan.